O‘zbekiston Markaziy banki Internet tarmog‘idagi firibgarlikdan ogohlantirdi

Markaziy bank o‘zining Telegram kanalida Internet termog‘ida keng tarqala boshlagan firibgarlik haqida xabar berdi. Firibgarlar xorijiy valyutadagi ma’lum bir to‘lov evaziga xalqaro moliya bozoriga olib chiqish (FOREX platformasi), tahliliy materiallar bilan ta’minlash, maslahatlar berishni taklif qilishadi.

Pul o‘tkazilganidan keyin firibgarlar go‘yoki savdo platformasi bilan ishlashda zarur bo‘ladigan masofadan foydalanish dasturini o‘rnatishni so‘rashadi. Aldov qurbonlari o‘zlarining investitsiyalari o‘sib borayotganini ko‘rishadi, ammo ularni yechib olishga urinishganda “tahlilchi” turli bahonalar bilan mablag‘ni chiqarib bermaydi yoki umuman aloqaga chiqmay qo‘yadi.

Shundan keyin shaxsiy cabinet orqali mablag‘ni yechib olish uchun so‘rov yuborilganida brokerlik kompaniyasi tomonidan “kutilmoqda” degan belgi ko‘rsatiladi.

Markaziy bank firibgarlarning tuzog‘iga tushib qolmaslik uchun turli shabhali tashkilotlarning hisob raqamlariga mablag‘ o‘tkazishda ehtiyot bo‘lishni maslahat bermoqda.