Eng ko‘p yuklab olingan ilova: ChatGPT Instagram va TikTokni ortda qoldirdi

2025-yilning mart oyida OpenAI kompaniyasining ChatGPT ilovasi global miqyosda eng ko‘p yuklab olingan mobil ilova bo‘ldi (o‘yinlar bundan mustasno). Bu natija bilan ChatGPT uzoq yillardan beri yetakchilik qilib kelgan Instagram va TikTok kabi platformalarni ortda qoldirdi. ChatGPT tarixida ilk bor oylik yuklab olishlar bo‘yicha reytingda birinchi o‘ringa chiqishi bo‘lib, ilova uchun eng yirik muvaffaqiyatlardan biri sifatida qayd etildi.

Appfigures tahlillariga ko‘ra, bu yilning mart oyi davomida ChatGPT ilovasi 46 million marta yuklab olingan bo‘lib, bu ko‘rsatkich fevral oyiga nisbatan 28 foizga oshganligini ko‘rsatadi.

Mart oyida ChatGPT ilovasining dunyodagi eng ko‘p yuklab olingan ilovaga aylanishining bir nechta asosiy sabablari bor. Ular quyidagilardan iborat:

• Ilovaning yangilanishlari va yangi funksiyalar: OpenAI mart oyida ChatGPT ilovasida bir qator yangilanishlarni amalga oshirdi. Ilovadagi yangi funksiyalar, jumladan, rasm yaratish imkoniyatlari foydalanuvchilar orasida katta qiziqish uyg‘otdi va ilovani yanada mashhur qildi. Masalan,  OpenAI ChatGPT-4o so‘nggi versiyasini chiqardi. Foydalanuvchilar ushbu vositaning yangi tasvir yaratish imkoniyatlaridan foydalanib, yaponiyalik Studio Ghibli animatsion firmasi uslubida, ularning asoschisi va rejissyori Xayao Miyazaki tomonidan chizilganga o‘xshash tasvirlarni yaratishdi.

• ChatGPT brendining kuchli tanilishi: Sun’iy intellekt ilovalari orasida ChatGPT brendi juda kuchli. Foydalanuvchilar yangi ilovalarni izlash o‘rniga, ilgari sinab ko‘rgan va ishonchli bo‘lgan ChatGPTni tanlashadi. Bu, ilovaning raqobatchilardan farq qilishi va yuqori o‘rinlarni egallashiga yordam berdi.

• Oson va foydali xizmatlar: ChatGPT foydalanuvchilarga turli maqsadlar uchun, masalan, matn yozish, savollarga javob berish, kod yozish, tarjima qilish kabi xizmatlarni taqdim etadi. Bu, ayniqsa o‘z ishini tez va samarali bajarishni xohlaganlar uchun foydalidir.