Ijtimoiy tarmoqlarda kuniga yetti soatdan kam uxlash terining qarishini tezlashtirishi haqida maʼlumotlar tarqaldi.
HUKM: ROST
Klivlend Ogayo universiteti kasalxonasida o‘tkazilgan tadqiqot shuni ko‘rsatdiki, uyqu sifati terining holatiga va uning qarish tezligiga bevosita ta’sir qiladi.
Uyqusizlikdan aziyat chekadigan odamlarda terining qarish belgilari aniqroq namoyon bo‘ladi. Ularning kollagen va elastin darajasi pasayadi, bu esa o‘z navbatida ajinlar paydo bo‘lishiga va terining elastikligi yo‘qolishiga olib keladi.
“Journal of Clinical and Experimental Dermatology” jurnalida chop etilgan tadqiqot uyqusizlik va teri kasalliklari o‘rtasidagi bog‘liqlikni ko‘rsatdi. Buning sababi, odatda chuqur uyqu paytida sodir bo‘ladigan hujayralarning qayta tiklanish jarayonining buzilishidir. Uyquga to‘ymaslikdan shikastlanish yoki ultrabinafsha nurlar ta’siridan tiklanish jarayoni sekinlashishi mumkin.
Kechasi kamida yetti soat uxlash teri salomatligining muhim tarkibiy qismidir va bu erta qarishning oldini oladi. Uyquning yetishmasligi, aksincha, teskari oqibatlarga olib kelishi mumkin. Albatta, sog‘lom uyqu bilan birga, to‘g‘ri ovqatlanish va parvarishni ham e’tiborsiz qoldirmaslik kerak.
Faktchekerlar hamjamiyatiga qo‘shiling.
Manba: https://factchecknet.uz/2024/04/30/uyqusizlik-terining-qarishini-tezlashtiradimi/