Sport dasturlashi bo‘yicha birinchi O‘zbekiston chempionati g‘oliblari 30 000 $ olishadi

O‘zbekistonda ilk bora o‘tkaziladigan, yutuq jamg‘armasini tashkil etadigan 30 000 $ olti nafat g‘olib o‘rtasida taqsimlanadigan sport dasturlashi bo‘yicha onlayn-chempionatga ishtirokchilarni ro‘yxatga olish boshlandi.  Dasturlash  bo‘yicha birinchi chempionatning tashkilotchilari IT Park va Dubai future Foundation hisoblanadi. Chempionat 8 noyabrda  start oladi. Texnopark matbuot xizmati shu haqda xabar qildi.   

Sport dasturlashi — aqliy sportning bir turi bo‘lib, unda yaratuvchilar dasturlashning C/C++, Kotlin, Java va Python kabi ommabop tillaridan foydalanib murakkab algoritmik masalalarni tezlikda hal etishlari kerak bo‘ladi.

Onlayn-chempionat ikki bosqichda o‘tkaziladi:

• 1-bosqich: Saralash —  28 - 29 noyabr. Finalga chiqish uchun maxsus vazifalarni yechish.
• 2- bosqich: Final — 5 - 6 dekabr.

Ishtirokchilar quyidagi yosh toifalariga ajratiladi:

• А Toifa — 30 yoshgacha (murakkab vazifalar);
• Б Toifa — maktab o‘quvchilari (osonlashtirilgan vazifalar).

Jyuri har bir toifada 6 nafar g‘olibni aniqlaydi va mukofot jamg‘armasi ular o‘rtasida taqsimlanadi.  

Tanlovda qatnashish bepul, ammo quyidagilar talab etiladi:

• Mamlakat rezidenti bo‘lish;
• One Million Coders kurslaridan birini tugatgani haqida sertifikatga ega bo‘lish;
• 16 dan 30 yoshgacha bo‘lish;
•  Ro‘yxatdan o‘tish.
• «IT Park Cupning saralash bosqichida ishtirok etadigan talabalar avtomatik ravishda  O‘zbekistonda ICPCning chorak finalida ishtirok etishlari mumkin», ― deyishmoqda texnoparkda.